Udalaren berbetan, etxebizitza hauek beste pauso bat dira "etxebizitza beharrizana" duten pertsonak laguntzeko. Alde horretatik, etxebizitza politiketan "norabide aldaketa" bat eman gura dutela adierazi dute "premia handiena duten sektoreei, hala nola gazteei" emantzipazioan lagunduta. Bestalde, marko horren baitan kokatu dute Udalak eta Jaurlaritzak trenbide zaharreko orubean Babes Ofizialeko 240 etxebizitza eraikitzeko akordioa.
Horrez gainera, udalak gazteen emantzipaziorako laguntzak kaleratu ditu. 70.000 euroko diru poltsa prestatu du 18 eta 35 urte bitarteko gazteei etxebizitza alokairuari aurre egiten laguntzeko. Eskabideak aurkezteko epea apirilaren 24an amaituko da. HAZen edo udalaren egoitza elektronikoan egin beharko dira. Oinarri guztiak www.durango.eus atarian kontsultatu daitezke.