2015ean hiru ordezkari lortu zituen Durangon Herriaren Eskubideak. Udal hauteskundeetara lehenengoz aurkeztu zen orduan eta Durangoko Udalean hirugarren indarra izatea lortu zuen. 2019an laugarren zinegotzia lortu zuten eta EH Bildurekin gobernazio ituna lotu zuten. Julian Riosen berbetan, "herriari astindua" eman diote urte hauetan. Argitu duenez, "horretarako gakoa jende arrunta, herritarrak, politika egiten hastea, izan da. Horregatik politika egitera animatzen jarraitu gura dut. Izan ere, herritarrek gorbernatzen dutenean igartzen da". Gaineratu duenez, "herriarena dena, denona da eta denon artean kudeatu behar dugu".
Durangoko alkateordeak erreleboa "bermatuta" dagoela nabarmendu du. "Lan talde oso konpetentea dugu", dio. "Durangoko udaletxean zortzi urtez lanean egon ondoren erakutsi dugu politika egiteko beste modu bat posible dela. Eta, gogoa eta indarra dugu udal mugimendu ilusionagarri honekin jarraitzeko", azpimarratu duenez.
Riosek azaldu duenez, "Herriaren Eskubidea taldearen proiektuan nire aletxoa ipini dut, ageriko aurpegia izan naiz eta dena eman dut. Politika errelebo lasterketa bat moduan ulertzen dut: taldean egiten da korrika eta norberari egokitzen zaionean dena ematen da". Kalean jarraitzen duela gaineratu du, "politika egiteko eta Durango hobetzeko, hautagaitza independentea bultzatuz".
Herriaren Eskubidea taldeko ordezkariak gogoratu duenez, "demokrazia parte hartzailean sinesten dudalako sartu nintzen politikan, non denok izan behar dugun hitza eta botoa instituzioetan egon ez arren". Orain, gizarte hezitzaile moduan lan egitera bueltatuko da.