Durangoko Udalak beste 143.000 euro eman dizkie 101 ostalaritza negoziori laguntza zuzen bidez

Laguntza hori tokiko negozio eta autonomoei aurtengo urtarrilean emandako 190.000 euroei gehituko zaie

Durangoko Udalak 143.000 euro eman dizkie herriko ostalaritza-negozioei, azken urtean COVID-19aren ondorioz ostalaritza-sektoreak bizi dituen murrizketen ondorioak arintzeko, prentsa oharrean azaldu dutenez. "Zuzeneko laguntza horiek datozen egunetan emango dizkie udalak onuradunei, eta laguntza hori tokiko negozio eta autonomoei aurtengo urtarrilean emandako 190.000 euroei gehituko zaie", azaldu dute. 

Durangoko Udalak 101 ostalaritza-negoziori eman die laguntza, hau da, eskatu zutenen % 99ari; Eskaera bakarra baztertu da, eskatutako baldintzak betetzen ez zituelako. Gainera, eskatzaileen %83k –84 negozio– baimendutako gehieneko zenbatekoa jasoko dute: 1.500 euro. Taberna eta jatetxeentzako oinarrizko laguntza 1.000 eurokoa izan da, eta 500 euroko gehigarria eskaini da negozioek hiru langile baino gehiago badituzte edo 30 metro koadro baino gutxiagoko terraza bat badute (terrazarik ez duten tabernek ere eskatu ahal izan dute gehigarri hori). Oharrean diotenez, bi baldintza gehigarri horiek bi aldeek egindako bileran adostu zituzten ostalariek eta udalak.

"Badakigu laguntza hauek ez dituztela pandemiak eragindako kalte guztiak konpontzen, baina uste dugu erakundeok gure bizilagunei susperraldi ekonomikoaren bidera itzultzen lagundu behar diegula. Durangoko Udalak ahalegin handia egin du pandemiak gehien kaltetu dituen sektoreei laguntzeko, zuzeneko laguntzetara bideratu den zenbateko osoak erakusten duen bezala, tokiko negozioetan kontsumoa sustatzera bideratutako zeharkako zenbatekoez gain. Egoera aurre-pandemiko batera itzultzeko lanean jarraitu behar dugu", azaldu dute Aritz Bravo eta Jorge Varela zinegotziek.

 

2.301.849 euroko Berraktibazio Plana

Zuzeneko laguntza horiek gobernu-taldeak herriko sektore politiko, ekonomiko eta sozialekin batera diseinatutako 2.301.849 euroko Berraktibazio Planaren barruan daude. Plan horren barruan, Udalak 500.000 euro bideratu zituen tokiko merkataritzarako eta ostalaritzarako zuzeneko laguntzetarako. Egindako bi deialdietan 330.000 euro banatu dira, eta, horregatik, gainerako dirua Merkataritza Biziberritzeko Planean (PERCO) jasotako neurriak garatzeko erabiliko da, hala nola prestakuntzak, dinamizazio-jarduerak, etab., herriko ostalarientzat, merkatarientzat eta autonomoentzat.

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.