Durangoko galdeketa

EH Bildu: "5 dorre eta 554 etxebizitza berri, hori da Durangok behar duena?"

Anboto 2021ko mar. 5a, 09:37

Inork ere ez ditu gure herriaren beharrizanak ezagutzen hemen bizi garenok baino hobeto. Norbaiten ustetan ideia ona izan zitekeen 18 solairuko luxuzko bost dorre eraikitzea, krisia baino lehenago agian. Garaiak aldatu egiten dira, baita pertsonen lehentasunak ere.

Martxoaren 14ko herri galdeketa 3.000 durangarrek eskatu zuten eta udalean aho batez onartu zen. EAJk, PSEk eta ETSk egindako hobekuntzak txertatu dira prozesu osoan zehar. Gai honetan, borroka alderdikoiek ez dute zentzurik.

Orain aukera paregabe baten aurrean gaude: orain 20 urte durangarrei kontsultatu barik erabaki zenagaz aurrera jarraitzea, ezezko botoa emanez; ala prozesu parte hartzaile bat zabaltzea Durangon ditugun premiez hausnartzeko, baiezko botoa emanez.

Guk baiezkoaren alde egingo dugu, arrazoi hauengaitik:

Lehenengo, trenaren lurperatzearen gainkostuak berreskuratzeko, ondare publikoa pribatizatu gura digutelako, eta lursailen 100 urteko okupazioaren ostean durangarrok ez ditugu gainkostu horiek gure gain zertan hartu. Are gutxiago jabetza publikoa izanda.

Bigarrenik, ordaindu ahal duenarentzat egindako luxuzko 5 dorreak Durangoren zatiketa betikotuko duten harresi fisiko eta sozial bat bihurtuko direlako.

Eta, azkenik, etxe berriek 1.500 biztanle berri ekarriko dituztelako, inguruetan auto, trafiko eta kutsadura handituz eta herri osoko zerbitzuak saturatuz. Belaunaldi berrientzat hipoteka bat.

Lursail hauek aukera ezin hobea eskaintzen digute etorkizuneko Durango birpentsatzeko. 554 etxebizitza berri egitea: beharrezkoak dira ala premia larriagoak ditugu? Martxoaren 14an erabakiko da, ez hutsik egin!

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!