Errefuxiatuen aldeko besarkada kolektiboa egingo dute Durangon

Markel Onaindia 2019ko mar. 27a, 12:11

Europa mailako ekimen bat egingo dute maiatzaren 5ean, eta Euskal Herriko mobilizaziorako Durango hautatu dute. Azaroan kontinenteko 200 pertsonek Artean eginiko batzarrean erabaki zuten deialdi bateratua egitea. Apirilaren 4an batzar informatibo zabala egingo dute ekimenari buruz, Pinondon, 19:00etan.

Ongi Etorri Errefuxiatuak plataformako kideek gaur eman dute maiatzaren 5eko ekimenaren berri. Ezkurdin hasiko da 12:00etan, eta lau zutabetan banatuko da mobilizazioa. Gero, Landako Gunean besarkada sinboliko bat gauzatuko dute. "Herrien, pertsonen eta giza eskubideen aldekoa" izango dela azaldu dute antolatzaileek. "Parte-hartzaile guztiak elkar besarkatuko gara, neofaxismoaren aurrean duintasunezko bizitzaren eta migratzeko eskubidearen alde". Izan ere, esan dute "arduratuta" daudela azkenaldian arlo politikoan agertutako diskurtso "xenofobo, atzerakoi eta antifeministekin". 

Ongi Etorri Errefuxiatuak plataformako kideek diote 2018an 2.262 pertsona hil zirela Mediterraneoan, Europako kostaldera ailegatzeko asmotan zeudela. Bigarren Mundu Gerraz geroztik izandako migrazio krisi handiena dela ohartarazi dute. 

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!