Coellorena kasu berezia da. Duela 16 hiletik ume txiki bategaz bizi da. Asier Aginako senarra urtarrila amaieran utzi zuten libre, gaixotasun larri baten eraginez. Horregatik, hirurek batera egoteko eskubidea dutela uste dute senide eta lagunek. Gaur aurkeztutako mozioa onartuta, espetxe zuzendaritzari hurrengo eskaera egin dio udalak: gradu-progresioa ezartzea, eta "lehenbailehen" askatzea. Izan ere, Coellok hirugarren gradua beharko luke baldintzapeko askatasuna lortzeko. Orain lehen graduan dago.
Mozioa EH Bilduk eta Herriaren Eskubideak babestu dute. EAJ abstenitu egin da, eta PSE-EEk aurka bozkatu du (PP ez da egon bilkuran). Aritz Bravok (EH Bildu) esan du presoen eskubideen alde daudela, baita senide eta lagunen alde ere. Estatuko gobernua kritikatu du. "Espainiak ez du bere legea ere betetzen". Patxi Lakuntzak (Herriaren Eskubidea) "giza eskubide guztien alde" daudela azaldu du, eta denentzat lege bera ezartzea eskatu du. EAJk ez du mozioa babestu, baina trabarik ez duela jarriko adierazi du Goiztidi Diazek, abstentzioa azaltzeko. "Beti egongo gara giza eskubideak bermatu eta betetzearen alde". PSE-EEk ez du bere kontrako botoa arrazoitzeko berbarik hartu.