Herriaren Eskubideak uztailaren 9an salatu zuen obra, eta uztailaren 17an eginiko batzorde zabalean ere bai, EH Bildugaz batera. Baina, obrek aurrera jarraitu dute, azaroaren 5ean bulego teknikoko erantzuna heldu arte; obrak etetea agintzen zuen. Hori bai, jada amaituta zeuden. Gobernu taldeak adierazi du, egia dela partzelen muga gainditu duela ETSk, eta irailean obra eteteko eskatu ziola. EAJk eta PSE-EEk mozio alternatiboa aurkeztu dute, etorkizuneko obretan partzelak errespetatzeko eskatuz, eta ETSk Durangon eginiko inbertsioa eskertuz.
Tentsioa egon da bilkuran. EH Bilduk proposatu du mozioa, eta Herriaren Eskubidearen puntu bat gehitu dute: Mari Jose Balierren dimisioa, "gestio txarragatik". Pilar Riosek (PSE-EE) Balierren izena zikintzeko saiakera egotzie die. "Hain argi baduzue, joan zaitezte auzitegietara". Goiztidi Diazek (EAJ) Balier babestu du, eta "beti legearen barruan" jokatu duela nabarmendu du. Beharrezkoa bada auzitegietara joango direla erantzun du Jorge Varelak (HE), eta gertakariak "larriak" direla adierazi du.
Ion Andoni del Amoren (EH Bildu) ustez, "ETSk txarto egin du eta zigorra merezi du". Gainera, hileotan gobernu taldea "non egon" den galdetu du. Mozio alternatiboa kritikatu du, "zigortu beharrean ETS txalotu" duelako. Riosek erantzun du udala jakinaren gainean egon dela, eta ETSgaz koordinaziorako harremana duela.