Trenez heldu ziren gehienak, euren ordura arteko bizimodua atzean utzita lana aurkitzeko asmoz. Frankismoko agintariek etxeak eraiki zituzten –uztarriaren eta gezien sinboloak oraindik ere ikusi ahal dira nonbait, asko kendu diren arren–, eta San Fausto, Juan Itziar eta San Roke edo Mataderoko auzoak sortu ziren horrela, periferian.
Durangoko Udal Artxibotik atal honetara dakargun argazkia 1958koa da, San Faustoko etxe berrien giltzak entregatu zituztenekoa. Jendetza joan zen ekitaldira, eta Jose Luis Azpiroz alkate frankistak eman zituen beharginei saldutako etxeen giltzak.