Aitziber Irigoras alkateak eta Mari Jose Balier eta Pilar Rios alkateordeek eman dute prentsaurrekoa, udaleko idazkariak, kontu-hartzaileak, arkitektuak eta erakunde autonomoetako presidenteak lagunduta. Izan ere, zazpi horiek udaleko zuzendaritza taldea osatzen dute; proiektuak epeetan jarri eta jarraipena egiten diete. 2016ko urritik ibili dira gestio plana lantzen. Merkatu plazako proiektuaren inguruan galdetuta, informazioa aurrerago emango dutela adierazi dute.
Antolaketan ere aldaketak egiteko asmoa dute. Nagusia, udal batzordeei lotutakoa; zazpi batzordetatik hirutara pasa gura dute. Antolaketa, Herritartasuna eta Lurraldea izango lirateke, osoko bilkuran onartu beharrekoak. Hain zuzen, 200 ekintzak hiru adar horien baitan zehaztu dituzte. Momentuz, 2017ko udal aurrekontua onartu barik dago, baina ez omen da arazo izango proiektuekin aurrera egiteko.
Erronka eta helburuak
Irigorasek esan du "Durango erakargarriagoa, kohesionatuagoa, ongizate maila altuagokoa, berdintasun gehiago bermatzen duena, identitate propioduna, parte-hartzailea, euskalduna, jasangarria, dinamikoa eta gizarte eta ingurugiro mailan konprometitua" lortu gura dutela planagaz. Riosen arabera, "herritarren bizi kalitatea hobetzea" da helburu nagusia, eta planagaz egin duten "eredu aldaketa eta esfortzua" nabarmendu ditu. Balierren esanetan, herritarrei begirako "hirigintza atsegin eta erosoa" garatzeko nahia agertu du.