Alberto Barreñak 12 urte zituen 1937ko martxoaren 31n. Bonbardaketak hasi zirenean hilerri ingurura, Santi Kurutzera joan zen korrika batean. Orain urte batzuk jasotako Albertoren lekukotasunak une horretan durangarrek sentitu zuten izua lehen pertsonan azalarazten du. "Beldur itzela pasa genuen. Hilerrira bidean kamioiak hildakoz beteta pasatzen ikusten genituen". Arratsaldean gerra hegazkinak Durangora itzuli ziren. "Abadiño aldetik zetozela entzun genuen. Montorretan tiroak eta ametrailamenduak entzuten ziren". Barreñak erbestea ere ezagutu zuen. Santanderren itsasontzia hartu eta Normandiara (Frantzia) joan zen.