Durangoko 6 langabe kontratatuko dituzte, birziklapena zabaltzeko

Anboto

Lanbidek sustatutako Enplegu Planak martxan daude Durangaldean ere. Alde batetik, Durangoko Udalak programa bat garatuko du, eta beste herriei begira, Elorriokoak edukiko du ardura. Durangon, sei langabe hartuko dituzte, eta birziklapenaz kontzientziatzea izango da euren zeregina. Sei hilean jardungo dute lanean berriemaile lez izendatu dituztenak, eta birziklapenaren inguruko informazioa eskainiko dute, aterik ate.

Datuak jaso
Etxeetako birziklapenaren inguruan galdetuko dute berriemaileek, informazioa emateaz aparte. Horrela, Durangoko birziklapenaren inguruko datuak jaso ahalko ditu udalak. Azaroaren 17ra bitartean eman ahalko da izena, Lanbiden. Lan merkatuan sartzeko zailtasunak dituzten sektoreei begira sustatu dute plana.

Elorriotik eskualdera
Bestalde, Elorrioko Udalak 138.000 euroko diru-laguntza jaso du. Sei beharginek espazio publikoen eta kaleko altzarien mantenuan jardungo dute; beste batek eskualdeko Turismo Plana eguneratu eta Elorrioko bisita turistikoen programa antolatuko du; beste batek nekazaritza- produktuak sustatuko ditu.
Bestalde, beste herrietarako zazpi diru-laguntza eskainiko dituzte, langabeak kontratatzeko. Hilaren 30ean amaituko da eskariak aurkezteko epea.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!