Udaltzaingoak urriaren 12ra arte zenbatutako datuen arabera, aurten 10 oinezko harrapatu dituzte Durangon –gehienak zebra-bideetan diren arren, ez dute sailkapenik egin–. Baina, urriaren 21ean eta 23an beste bi istripu gertatu ziren Madalenan eta Larrasoloetan, eta joan zen barikuan, 80 urteko gizon batek 9 urteko ume bi harrapatu zituen. Beraz, dagoeneko 13 dira harrapaketak. Iaz 8 oinezko harrapatu zituzten; 2014an 14; eta 2013an 12. Ezin esan istripuak goraka doazenik, baina kopuru guztiak batuta, zer hobetu badagoela ikusi daiteke. Udaltzaingoaren esanetan, ez dago istripuak pilatzen diren puntu beltzik.
Semafororik ez
Durangoko Udalak herriko mugikortasuna hobetzeko estrategiak martxan ditu, eta horren baitan, trafikoa lasaitzea helburu zuten neurriak hartu zituen, oinezkoei eta txirrindulariei garrantzi gehiago emateko asmoz eta ingurugiroan pentsatuta. Hainbat kale norabide bakarreko bihurtu ziren, biribilguneak egin ziren, eta semaforoak kentzen hasi ziren; 2006an 148 semaforo zeuden herrian, eta 2013az geroztik Durangon ez dago semafororik. Gero ere, zebra-bideen egoera hobetzeko ekintzak garatu dituzte, iaz Fray Juan Zumarragako argiztapena indartzea, esaterako. Herri barneko abiadura 30km/h-ra bajatzeko ideia eztabaidatzen ere badabiltza, ANBOTOk jakin ahal izan duenez.
Horrez gainera, kontzientziazio dinamikak sustatu dituzte ume, gazte eta helduekin.
Istripu igoerarik ez
EAJ eta PSE-EEren gobernu taldearen arabera, ez da istripu igoerarik egon, alderantziz baizik. 1992tik 2003ra 10.000 biztanleko 10,1 harrapaketa gertatu zirela dio gobernuak, eta 2004tik 2013ra 2,9 izan zirela batez beste. Gaur egun, 2,8koa ei da datua. Bizkaiko beste herri askotan, datua 5,3 dela nabarmendu dute gainera, eta Durango batez bestekoaren “oso behetik” dagoela. “Egindako lanek emaitza onak eman dituzte, eta beste herri batzuentzat eredu gara”. Udal arduradunen iritziz, istripurik gehienak despisteengatik dira.
Azterketa beharraz
Zebra-bideetako istripuen gaia azken osoko bilkurara ere heldu zen, EH Bildu eta Herriaren Eskubidea alderdien eskutik. Egoeraren inguruko azterketa bat egitea eskatu zuten biek. Dani Maeztuk (EH Bildu) adierazi zuen “erabaki ona” izan zela trafikoa berrantolatzea, baina berrazterketa beharrezkoa dela. Julían Riosen (HE) iritziz, segurtasuna indartzeko kontzientziazio kanpaina gehiago egin beharko lirateke.
"Ikaratuta gaude gertatzen dabilena ikusita"
Auto gidari batek Rosa Trinidaden semea harrapatu eta hil zuen bizikletan zihoala, 2004an. Hori gutxi ez, eta gidariak indemnizazioa eskatu zion familiari. Orduko borroka hartan gogortua, trafikoaren segurtasunagatik kezkatzen hasi zen, eta gaur egun Stop Accidentes Euskadiko ordezkaria da Trinidad durangarra. Hoberantz goazela uste du, baina hobetzeko asko dagoela ere bai. Zelan jaso dituzu azkenaldiko istripuak? Zergatik gertatzen dira zebra-bideetako istripuak? Ez da berdina eguzkiagaz edo euriagaz gidatzea. Eta alkohola edo drogak badaude tartean... Bizikletek harrapatu dituztenen kasuak ere badaude... |
