Gizonetan eta nagusietan Xistera Zirkuituko lehenengo txapelaren jabe dira Antxon Alberdi eta Txomin Bereziartua. Durangoko Ezkurdi Jai-Alai pilotalekura batutako zaleek final lehiatuagaz gozatu zuten: Alberdik eta Bereziartuak 30-25 menderatu zituzten Kosme eta Del Rio. Esaterako, partiduko parekotasunaren adierazgarri, 16-15 eta 24-22 joan ziren.
Gizonetan eta gazte mailan Mancisidorrek eta Bereziartuak 25-11 irabazi zieten Vidal eta Arrizabalagari. Irabazleek partidua hasieratik hautsi (6-1, 13-3) eta nahiko erraz irabazi zuten.
Emakumeen nagusi mailan, Nahia Calvok eta Izaro Arbek jantzi zuten txapela: 15-8, Eneritz Lizardi eta Jane Arreitunandiaren kontra. Arberen esperientzia izan zen gakoetako bat. Hamar urtetik gora daramatza zestan jokatzen eta bere eskuina zein errebesa arerio gazteenak baino zehatz eta sendoagoak zirela erakutsi zuen.
