Lan erreformak hasi zirenetik hamar urte beteko direla adierazi du LABek, eta langileei “benetako krisia” eragin dietela. Adibidez, epe luzeko langabezia %19tik %43ra pasa dela esan du, edota diru sarrerak bermatzeko errentaren hartzaileak %63 hazi direla. “Egoeraren larritasuna” ikusita, prekarietatearen aurkako protestak deitu ditu. Bihar, manifestazioa egingo du Bilbon, 17:30ean, udaletxean hasita. Ekainaren 3an ABLEak (Aldi Baterako Lan Enpresak) ixtea eskatuko du Durangon, udaletxetik 11:30ean hasita.
Gainera, “egoerari buelta emateko” alternatibak plazaratuko ditu LABek: 1.200 euroko gutxieneko soldata, 35 orduko lan astea, lan osasuna ziurtatzea, euskaraz lan egiteko eskubidea eta neurri horiek emakumeei bermatzea.