Ibilbideak bost gune izango ditu: Zuhatzola, Landako gunea, Mataderoa, Kurutziaga, eta Tabira. Guztira 6 kilometro izango ditu. Ibilbide honen berezitasuna norabide jakinik ez duela da. Norberak aukeratuko du norabidea. Antolatzaileek sei kilometroko ibilbide luze bat proposatu dute. Era berean, herri barrutik beste ibilbide laburrago batzuk egin daitezke.
Egitarau aurrerapena
Egitarauari dagokionez, lan-ildoen berri eman dute. Talde handi famatuak ekarri beharrean, inguruko taldeei aukera ematea hobetsi dutela azaldu dute. “Ibilaldiak bultzatu gura dituen balioekin bat egiten duela uste dugu, horregatik, Durangaldeko taldeekin, Euskal Herriko talde gazteekin, eta Durangoko elkarte ezberdinekin elkarlanean gauza asko antolatu ditugu urtean zehar, bertso saioa, musika/dantza ekimena… eta Ibilaldi eguna ere”
Ibilaldi eguneko antolakuntzan buru-belarri dihardute. Azaldu dutenez laguntza gehien trafikoa bideratzeko behar dute, 160 lagun, hain zuzen. (Izena ematea: www.ibilaldia.eus).