Tabirako kanpoko igerilekuetako zelaia handitzea erabaki du udalak, eta obra hori burutzeko 59.000 euro erabiliko ditu. Iazko udan, edukiera bete egin zen egun batzuetan, eta jendea sartu ezinik edo ilaran geratu zen.
Goiztidi Diazek (EAJ) azaldu du hile bi falta direla uda sasoirako, eta neurria orain hartzea beharrezkoa dela. “Durangok bere instalazioak ondo egotea merezi du”. Pilar Riosen arabera, “jende askok erabiltzen ditu igerilekuak”, eta beharrezko neurria da. Fran Garatek ere arrazoi bera ikusten du.
Iker Urkizaren (EHB) iritziz, beste lehentasun batzuk daude: “59.000 euro gastatuko dira, birritan bete zelako. Akaso ez da hain beharrezkoa”. Gainera, udala plan orokorra lantzen hasiko denez, horri itxarotea eskatu du. Julia Pererak (HE) zalantza agertu zuen, beharrezko ikusi arren: “Zelaia handituko da, baina igerilekuak eta aldagelak ez. Zalantza sortzen digu”.