Azokaren aurkezpenean Inma Bardezi eta Javi Arrieta egon dira, Bardezi eta Sylke arropa dendetakoak, hurrenez hurren. Azken asteak gogorrak izan arren, Bardezik gogoratu du negu beroa egin duela, eta horregatik, arropa dendetan “sasoi gaitza” izan dela. Ondorioz, aurtengo arropari dagokionez "nahi baino gehiago" geratzen zaiela azaldu du Arrietak.
Arropa bezala, beherapen handiekin lortu ahalko dira beste hainbat produktu ere. Hainbat sektore egongo dira: kirol moda, oinetakoak, optikak, burdindegiak, autogintza... Erosketak egiten dituztenen artean zozketak egingo dituzte gainera. Plateruena, Akebaso eta Kobika jatetxeetarako menuak zotz egingo dituzte, hain zuzen.
Barikutik domekara
Barikuan eta zapatuan 10:00etatik 14:00etara eta 17:00etatik 21:00etara egongo da zabalik azoka. Domekan, ostera, 11:00etatik 14:00etara eta 17:00etatik 19:00etara. Antolatzaileek umeentzako ludoteka eskainiko dute, eta ipuin kontalaria eta poneyak ere bai.