Gaurko norgehiagokak berebiziko garrantzia du. Aranor Iraurgi Espainiako txapelketarako sailkapen zuzena ematen duen bigarren tokian kokatuta dago, eta Tabirako Baquek postu hori kendu diezaioke. Garaipen bateko aldea dago bien artean, eta durangarrek puntu bigatik galdu zuten Azpeitian. Beraz, helburua argia da: garaipena, gutxienez hiru puntuko aldeagaz. Esatea egitea baino errazagoa da, Iraurgi multzoko talderik indartsuenetakoa delako. Julen Berrocal entrenatzailearen ustez, “gure barne joko indartsua aprobetxatzea” da partidua irabazteko gakoetako bat. Aitziber Ardanza, Maiane Aizpurua eta, Olatz Garitaonandiaren ekarpenean oinarritzen da, batez ere, Tabirakoren barne jokoa.
Gizonak liderraren aurka
Gaur, 12:00etan, juniorren partiduaren ostean, gizonen talde nagusiak Valle de Egües liderra hartuko du, etxean. Iskander de Diosek zuzendutako taldea bosgarren dago, baina gertu ditu bere aurretik daudenak.
Partidu honen atsedenaldian, Bizkaiko Saskibaloi Federazioaren 75. urteurrena ospatzeko ekitaldia egingo dute. Tabirako, Zaldua, Anbotopeko eta Berriz taldeetako presidenteek eta Bizkaiko federazioko presidenteak parte hartuko dute.