Mozioak bigarren zati bat ere bazuen, trena lurperatu ostean libre geratu den lursailari buruzkoa. Eremu horretarako diseinatuta zegoen plana aldatzeko prozesu parte-hartzaile bat martxan jartzea eskatu zuen EH Bilduk, bertan dorretxeak eraikitzeko egitasmoa etenda dagoela ikusita. “Burbuilaren garaiko proiektua da, eta egokitu egin behar da”.
Herriaren Eskubideak soilik babestu zuen mozioa, eta beste guztiek aurka eginda, ez zen aurrera atera. Ordea, Fran Garateren (PP) ustez, udalak “jarraipen handiagoa” egin beharko luke. Goiztidi Diazek (EAJ) azaldu zuen udalak Hiri Antolamendurako Plan Orokorra landuko duela partaidetza bidez: “Jada martxan dagoena eskatzen zabiltzate”. Arrazoi bera bota zuen Mauricio Garcíak (PSE-EE): “Ez du zentzurik trenbideko plana aldatzea eskatzeak, HAPO aldatu behar bada”.
Jorge Varelaren iritziz (HE), “herritarrei lursailari buruz galdetzeko” aukera litzateke mozioa aurrera ateratzea.