Txosna Batzordearen iritziz, Landako Gunea espazio oso zabala da: "Durangoko jaietan gaur egun ibiltzen den jende kopuruarekin oso zaila da bertan jai giroa sortzea". Eraikin handia izanda, botila-festak erakarri direla diote. Gainera, kanpoaldeko eremuaz, txosnak ipintzeko muga teknikoak daudela esan dute, eta ondorioz, kanpoaldeko gune hori ez dela erakargarria izan uste dute. "Durangoko jaietan zehar, Landako Gunea ez da jai giroko ohiko tokia". Giroa sortzeko ahaleginak egin dituztela azaldu dute, baina hainbat ekitalditan beste gune batzuetan baino jende gutxiagok parte hartu duela.
Guztia ez da txarra izan Txosna Batzordearen arabera. Landako Guneak hainbat erraztasun tekniko eskaintzen dituela diote, eta bertako beharginekin ere hartu-eman ona eduki dutela. Bestalde, durangar eta kanpotar asko Txosnagunera hurreratzea lortu dutela esan dute, eta eskerrak eman dizkiete guztiei. Bereziki, egitarauan parte hartu duten sortzaileei.
Batzorde berezia
Joan zen eguenean udaleko kultura batzordekoekin batu ziren Txosna Batzordeko kideak, eta udaleko alderdi guztiekin osatutako batzorde berezi bat sortzea adostu zuten. Abenduan izango da lehenengo batzarra. Txosna Batzordeak, Txosnagune finko bat adosteko beharra azpimarratu du.