Etxeko norbait gaixotu eta uneoro besteen laguntza behar duenean, normalean familiako batek hartzen du bera zaintzeko ardura. Zaintzaileen %87 emakumeak dira, eta gehienak 60 urtetik gorakoak. Ardura hori bakarrik hartzen dutenek, egoera estresagarriak bizi izaten dituzte sarri, eta hori sahiesteko asmoz, zaintzaren lanak etxekoen artean banatzea eskatu dute Zaindu programako bultzatzaileek. Aurten, gazteei begira egingo dute batez ere inplikaziorako kanpaina.
Amankomunazgoko eta Durangoko Udaleko adinekoen sailetik bultzatzen da Zaindu programa, Aldundiaren laguntzaz. Kanpaina hainbat txirrindularik babestu dute, eta hori arrazoitzeko, Aitor Lopez Amankomunazgoko presidenteak txirrindularitzaren eta zaintzaren balioak parekatu ditu: “Eguneroko lana, sakrifizioa, talde-lana...” . Lopezen esanetan, zaintza aurrera eramateko modu ugari daudela transmititu gura dute kanpainagaz. Pilar Ríos Durangoko alkateordeak dioenez, zaintzaren ikuspegi baikorra ere zabaldu gura dute. “Gaixoarekin egotea edo beragaz jolastea ere bada zaintzea”.