Herria auzo elkarteak emango dio hasiera jaiari, urriaren 10ean. Iker Oceja zinegotziak elkarteak 38 urtetan egindako lana baloratu du. Ekintza kultural eta solidarioez aparte, elkartea auzoaren baldintzak hobetzeko sortu zela gogoratu du. "Eboluzionatu egin du, baina auzoaren hobekuntzaren alde lan egiten jarraitzen du, besteen beharrak ahaztu barik". Bestalde, txupinazo txikia aurten 20 urte bete dituen Uztai gimnasia taldeak botako du.
Nobedade nabarmenena espazioen berrantolaketa da. Txosnagunea Landako Gunean kokatuko da, eta ondorioz, bertan egiten ziren ekintzak lekualdatuko dituzte. Asko Ezkurdira joango dira, marmitako txapelketa adibidez. Bestalde, tren geltoki zaharreko eremuan umeen parkea ipiniko dute, supermerkatuaren sarrera inguruan. Jaien amaiera ekitaldia, alboan, kotxetegi zaharren lekuan egingo dute.
Artopil herrikoia
Jaiak iragartzeko kartela Virginia Gonzalez 20 urteko durangarrak landu du. Jaietan izaten diren ekintza gehienak batzeko asmoa izan duela azaldu du prentsaurrekoan. 3.571 boto eman zituzten herritarrek bost kartel onenen artean aukeratzeko, eta irabazleak 1.531 boto jaso ditu.