Bateginez gobernuz kanpoko erakundeak 22 urteko elkartasun dinamika etetea erabaki zuen apirilean; Pochutako (Guatemala) elkarte bategaz lan egiten zuen, eta harenganako konfiantza galdu eta gero hartu du erabakia. Hara eginiko azkeneko bisitan, laguntzaren onuradunei kobratzen hasi zitzaizkiela konturatu ziren Bateginezeko kideak. Ez zekiten ezer, eta, gainera, ez daude ados. Konfiantza galdu dutenez, Bateginezen funtzioa amaitu dela uste dute. Herritarren aurrean esan gura dute agur, eta ekitaldi berezia antolatu dute ekainaren 11rako. 20:00etan hasiko da, San Agustin kulturgunean.
40 bazkidek eta umeei bekak ematen zizkieten 300 lagunek osatzen zuten Bateginez. Urtero 87.000 euro inguru bidaltzen zituzten Pochutara, eskolaratzean, bizi baldintzen hobekuntzan eta emakumeen jabekuntzan laguntzeko. Durangon ere ekintza ugari antolatu izan dituzte.
Egueneko ekitaldian musika, bideoak eta luntxa eskainiko dituzte, besteak beste. 22 urtean bizitakoa gogoratuko dute, eta kooperazioa eta elkartasuna babesteko mezua helaraziko dute.