Auzoz auzo herritarrekin batzartu dira EH Bilduko kideak, eta horiek egindako ekarpenak hurrengo legealdirako konpromiso bihurtu ditu koalizioak, gobernura helduz gero, noski. Aro berri baterako proposamenak izeneko dokumentuan jaso dituzte parte-hartze prozesu osoko ekarpenak, eta euren webgunean dago informazioa.
Udalaren gestioa egiten badute, partaidetza zuzenerako mekanismoak ipiniko dituztela azaldu du Eider Uribek. Adibidez, auzo kontseiluak sortzea. Hain zuzen ere, herritarrek batzarretan haserrea agertu dutela esan du Dani Maeztuk: "Argi utzi digute hartueman zuzenerako beharra dagoela". Izan ere, Uriberen arabera, "elkarteek oztopoak eta burokrazia gehiegi" topatu dituzte udalean. "Harresi burokratikoa" deitu dio Maeztuk.
Bestalde, kanpainaren balorazioa eginez, euren asmoa "kanpaina garbia eta eraikitzailea egitea" izan dela adierazi du Uribek, eta bere ustetan lortu dute.
