Aitziber Irigoras alkateak eta Jon Irazabal Gerediaga elkarteko kideak eman zuten ekintzaren berri, martxoaren 31ren harira landutako egitarauaren aurkezpenean. Irigorasek adierazi zuen Durango “tragedia baten biktima” izan zela: “Durangon ez beste inon berriro gertatu ez dadin, iragana ondo aztertu eta ondorengoei azaldu behar diegu”. Irazabalen berbetan, gazteekiko transmisioari garrantzia eman nahi izan diote Kriskitinegaz batera landu duten 31ko Oroimen Ekitaldian, eta Izaro Andres kantariak eta Eneko Sagardoy aktoreak parte hartuko dute. 20:00etan hasita, lore eskaintza Gregorio Urionaguenak eta Juana Lejarretak egingo dute. 12:00etan, Gerra Zibilaren biktimak omenduko ditu udalak kanposantuan.
