Sapuetxeko asanbladako kide batek “0tik hasi” gura dutela azaldu du. Baina oraindik ez dute eraikinaren filosofia berria zein izango den zehaztu. Mugimendu sozialen bilgune edo etxe bihurtzea da buruan duten ideietako bat, baina hausnarketa aurrerago egingo dute. Izan ere, duela hiru hiletik obretan murgilduta ibili dira: taberna eraberritu dute, eta lehenengo pisuan ere obretan dabiltza, sukaldea atontzen, besteak beste. Hain zuzen ere, etxe bloke handitik espazio bi horiek bakarrik erabiliko dituzte momentuz. “Jendeak proiektuak egiteko ilusioa badauka, goiko pisuak erabiltzeko aukera egongo da”, adierazi du Sapuetxeko kideak. Hogei bat laguneko taldea dabil lanean.
Zapatuan, jaialdia
Taberna berriztuta dago, eta zapatuan emango diote hasiera aro berriari. Eguerdian bazkaria egingo dute, eta arratsaldetik aurrera kontzertuak egongo dira ikusgai. 17:00etan, esaterako, folka eta punka uztartzen dituen Ganorabakoak taldeak joko du, Mañarian aurten sortu den taldeak.