Durandog mugimenduak deituta, 80 bat txakur jabe elkartu ziren zapatuan Tabiran, txakurren kontra azken asteetan egin diren erasoak gaitzesteko. Barruan iltzeak zeuzkaten saltxitxak agertu ziren hainbat berdegunetan, eta ondorioz, txakur bi gutxienez zauritu ziren; Partxe eta Amy txakurrak, hain zuzen ere. Txakur horiek eta euren jabeak ere Tabiran egon ziren.
Euregaz batera udaleko ordezkari batzuk ere egon ziren mobilizazioan. EAJko Mari Jose Balier alkateordea, Goiztidi Diaz, Andoni Iruarrizaga eta Jon Kepa Garro, eta PSE-EEko Pilar Ríos izan ziren parte hartu zutenak. Udalak mobilizazioa babestea erabaki zuen, aho batez, hilaren 30ean egindako bozeramaileen batzordean.