LABeko hainbat kidek ordu eta erdiko kontzentrazioa egin dute gaur Fumbarri enpresari silikosiaren aurrean neurriak har ditzala eskatzeko. Sindikatuko exekutibako Asier Imazek parte hartu du bertan, eta enpresari eskatu dio azterketa bat egin eta prebentziorako inbertsioa egin dezala.
90 behargin inguru daude Fumbarrin. LABen arabera, enpresak gaixo daudenei ez dizkie gutxieneko baldintzak bermatzen: "Enpresak ez du inolako borondaterik arazo honi irtenbiderik emateko". Silikosia fundizio eta marmoldegietako gaixotasuna da, silize hautsa dagoen lekuetakoa, eta laneko gaixotasun lez onartuta dago.
EH Bilduren babesa
EH Bilduko Dani Maeztu legebiltzarkideak ere parte hartu du kontzentrazioan. Koalizioak Fumbarriko langileen egoera salatu gura izan du, "larria eta tamalgarria" euren ustetan. Prebentzioa erakunde publikoen ardura ere badela diote: "Halakorik gerta ez dadin, ezinbestekoa da erakunde publikoen kontrola".