Urte bi pasatu dira ETAk ekintza armatuen amaiera iragarri zuenetik, baina Espainiako eta Frantziako gobernuek ez dute espetxe politika aldatu. Dispertsioak senide eta lagunak ere kaltetzen dituela ohartarazi dute deitzaileek: “Sakabanaketak eta etengabeko zigorrek egoera larrian jartzen dituzte gure senide eta lagunak”. Azaldu dutenez, Durangoko senideek astebururo 18.000 kilometro egiten dituzte guztira. Gainera, bidaia gastuak 2.900 eurora heltzen dira.
“Guzti honekin bukatu behar dugu, eta bukatuko dugu”, esan dute mobilizazioaren antolatzaileek. Euren ustez, posible da dispertsioari amaiera ematea, baina horretarako aktibazio soziala beharrezkoa dela diote: “Bakoitzak beretik ekarpena egiteko sasoia da”.