Udal barruko lana hobeto egiteko helburuagaz, erabaki du Bilduk liberazioa. "Udaleko beharraz gainera, kaleko lana ere egin gura dugu; eragileengana hurbildu, eurekin egon eta euren beharrak entzun. Orain arte ahal genuen moduan egin dugu lan, baina dedikazio osoa behar dela ikusi dugu", azaldu du Eider Uribek.
Lan ordu osora, baina alderdiei berez dagokien erdia kobratuta hartu du liberazioa Uribek, soldata osoa "nahikoa eta larregi" dela iritzita. Gaur egun, Durangoko alderdietako liberatuek 56.009,80 euroko soldata daukate. Aralarrek hala erabakita, Iker Urkizak %60a kobratzen du, 36.996,46 euro, eta Eider Uriberen soldata 28.005 eurokoa izango da.
Batzorde guztietako kide
Eider Uribe Padilla Bilduren ogasun arloko eta gazteria eta kirol arloko batzordeen arduraduna da. Oraindik aurrera, beste batzorde guztietako kide ere izango da, eta euretan bozkatzeko aukera izango du. Durango Kirolak erakundeak eta Mankomunitatean ere Durangoko Bilduko ordezkaria da.