Martitzenean egindako hileroko ohiko udalbatzarrean EAJren kudeaketa kritikatu zuten PSE-EEk eta Aralarrek. Oraindik onartu barik dago 2013ko aurrekontua. "Ohitura bihurtu da aurrekontu barik kudeatzea", esan zuen Dani Maeztuk (Aralar). Gainera, diru publikoa propagandarako erabiltzea egotzi zion Maeztuk EAJri: "Dirua irudikerian gastatzen jarraituko duzue?".
Idoia Agorriak (PSE-EE) ez gobernatzea leporatu zien jeltzaleei, eta lanean hasteko eskatu zien. Udalbatzarreko gai-ordena ere erabili zuen EAJren kontra egiteko: “EAJko bozeramaileak dio ez dugula lanik egiten, eta gaurko hiru puntuak oposizioak aurkeztu ditu”. Durangoko Udalak ez dauka aurrekonturik 2011tik, eta horien luzapenagaz kudeatzen dabil oraindino.