16 urtetik gorako parte-hartzaileek ordubete inguruko emanaldiak prestatu beharko dituzte. Baldintza bakarra euskaraz izatea eta 2-10 urteko umeei zuzenduta egotea da. Edozein disziplina landu daiteke: ipuin-kontaketa, antzerkia, musika emanaldia, umorea... Berbarok horren zabalkundea egiteko konpromisoa hartzen du, gainera.
Uztailaren 12ra arte izena eman daiteke. Irailean, aurkeztutakoen artean sei aukeratuko dituzte. Berbaroko kideak eta elkarteagaz hartu-emana duen jendeak parte hartuko dute epaimahaian. "Anitza izatea gura dugu", azaldu dute antolatzaileek. Lan horiek zuzenean aurkeztuko dituzte Plateruenean. Aukeratutako lan bakoitzak 200 euro jasoko ditu. Gainera, ikus-entzuleek bat aukeratuko dute, eta horrek 100 euroko saria jaso dezake.