Gerrikagoitia: "Geu Be guztia da guretzat, gazteentzako ere guztia delako"

Geu Beren 10. urtemugaren harira, Gerrikagoitiak eta Domarcok euren esperientzia azaldu dute.

 

Geu Beko atea zabaldu eta jende ugari ageri da eztabaidan edo eskulanean, 10. urtemugako ekitaldiak 

EGITARAUA  Maiatzak 18 10:00. Futbito egokitua Landakon. 17:00. Saskibaloia gurpildun aulkian, Ezkurdin. Maiatzak 19 09:00. Urritasunaren inguruko ibilbidea. Zaldibar, Berriz eta Elorriotik irteerak. 11:00-12:00. Luntxa Astolan. 13:00. Argazkia egoitzan. 17:00. Esku pilota Iurretan. Maiatzak 22 19:00. Berbaldia San Agustinen. Maiatzak 24 18:30. Tortilla txapelketa Andra Marin. 21:00. Bertso saioa Andra Marin: Iturriaga, Elortza, Enbeita eta Ugartetxea. Maiatzak 25 Landako Gunean 10:00. Herri kirolak eta jolasak 12:30. Txan magoa. 14:15. Bazkari herrikoia. 18:00. Dantza erakustaldia. 20:00. Triki-poteoa Plateruenean. 22:00 Kontzertuak: Motxila 21, The Autistix eta Jare.

prestatzen. Bertan dira Carmen Gerrikagoitia eta Oier Domarco ama-semeak. Hasieratik ezagutzen du elkartea semeak, ama bultzatzaileetako bat izan zen-eta. Durangaldeko ezindu intelektualen familien elkartea da Geu Be. 30 urte dauzka Oierrek, bere amak borroka egiten damamatzanak beste: “Oier ondo jaio zen. 21 egunera meningitisak jo zuen, eta horrek ondorioa utzi zion. Garrantzitsuena da, arazoa lehenengo egunetik onartzea. Errehabilitazioa, estimulazioa, ez dakit nora joan behar dela, mugitzea, psikologoak, logopedak, igeriketa... Mugitu egin behar dira, aktibatu. Pauso bat lortzea asko kostatzen da, eta konstantea izan behar da”.

 

Hogei urtegaz, hezkuntzako zikloa amaitu eta zereginik barik geratu zen Oier. Beste hiru familiagaz batera mugitzen hasi ziren. Eguneko zentroa eskatzen zuten, eta Zornotzan egin zieten lekua. Baina, Alkartasunako begirale ziren Gontzal Uriarte eta Jose Alfarogaz topo egin eta aisialdirako zer edo zer egin behar zutela pentsatzen hasi ziren. Hortik jaio zen elkartea. Gerora ere, bolondresen laguntza eduki dute. Begiraleez berba egitean, emozionatu egin da ama: “Familiak ez ginen hemen egongo bolondresik barik. Hori oso argi daukagu. Ez dago dirurik egiten dabiltzana ordaintzeko. Gainera, borondatez, musutruk”.

 

Gazteek pausoak eman ditzaten, euren garapenean etenik egon ez dadin egiten dute lan Geu Ben. Gazteentzako beharrizan bat dela dio Gerrikagoitiak: “Elkargune bat da, koadrilarako erreferentzia bat. Irtetean, ez dute gugaz etorri nahi, euren espazioa gura dute”. Barrenetik egin du berba: “Geu Be guztia da guretzat, gazteentzako ere guztia delako”. Gainera, gurasoentzako ihesbide bat dela uste du.

 

Geu Ben etxean baino hobeto dabilela aitortu du Oierrek: “Bideojokoetan jolasten ibiltzen naiz, ordenagailuan, marrazten, musika entzuten... Barikuetan, batzarra egiten dugu, zer egin pentsatzeko”. Lagun asko egin ditu bertan, eta begiraleekin ere ondo konpontzen da. Gazteak ere badabiltza urtemuga antolatzen: “Pankartak margotzen ibili gara, bertso saioan ipintzeko”. Jende guztia gonbidatu du ospakizunera: “Nik kontzertua ikusiko dut, bertsoak, eta bazkarian eta trikipoteoan ere egongo naiz”.