"Gabonetako salmenta apur bat ahul doa", esan dute elkarteko ordezkariek. Bultzada eman gura diote.
Zapatu honetan, abenduaren 22an, Gau irekia egingo dute +dendak elkarteko merkatariek. Durangon lehenengo aldiz garatuko da ekimen hau, ordezkariek azaldu dutenez. 41 saltokik parte hartuko dute, eta identifikazio legez alfonbra gorri bat edukiko dute sarreran. Arratsaldeko 19:00etatik 23:00etara zabalduko dituzte komertzioak, eta erosketak sustatzeko zozketak eta deskontuak eskainiko dituzte. Erosketak egiten dituztenen artean, 100 euroko balioa daukaten hiru erosketa-txartel zozketatuko dituzte, baita otzara bat ere. Gainera, komertzio bakoitzak bereizgarri propio bat eratuko du. Esate baterako, ardua, bonboiak, eta opariak egongo dira zenbait lekutan.
Prentsaurrekoan +dendak elkarteko ordezkariek eta merkatariek parte hartu dute. Adierazi dute ekimenagaz bultzada eman gura diotela Gabonetako salmentari: "Apur bat ahul doa", adierazi dute. Egoera sektore guztietan ematen dela uste dute merkatariek.
Gau irekia-k irauten duen bitartean, ludoteka ipiniko dute +dendak elkarteak Plateruen plazan daukan egoitzan. Erosketaren bat eginez gero doako zerbitzua izango da, bestela 5 euro ordaindu beharko dira. Gainera, personal shopper bat ere egongo da bertan, bezeroei aholku emateko.