Klimaren aldaketaren kontra mundu mailan deitutako mobilizazioekin bat egingo du Durangok. Horrenbestez, martxoak 31n, 20:30ean, eraikin eta iturri publikoetako argiak itzaliko dituzte, erakutsi guran \'berotze globalari bat eginda bakarrik egin ahal zaiola aurre\'.
WWF-ren Lurraren Ordua kanpainagaz bat egingo du Durangok, zapatuan. Horretara, klima aldaketaren kontrako "borrokaren adierazgarri" moduan udal eraikin ezagunak itzaliko dituzte: udaletxea, Lariz dorrea, Arte eta Historia Museoa eta Santa Arkua. Munduko 6.000 hirietako biztaneak mugiaraztea da aurtengo kanpainaren helburua.
Lurraren Ordua kanpainak herritarren parte hartzea bultzatu gura du, azaldu dutenez; baita udalak, enpresak, ikastetxeak, unibertsitateak, hedabideak eta ekimen global horrekin bat egin gura duen bestelako erakundeak ere. "Guztiak aktore inportanteak dira-eta klima aldaketan eragiteko".
WWF-ren Lurraren Ordua lehenengoz 2007an egin zen, herrialde bateko hiri baten bakarrik. 2009an, 88 herrialdetako 4.159 hiritako monumentu ezagunenen argiak itzali ziren, eta, 2010ean, 135 izan ziren parte hartu zuten herrialdeak. "Ekimenak 1.000 milioi pertsonek bat egitea lortu zuen; munduko biztanleriaren ia seirenak".
Durangok 2009an egin zuen bat lehenengoz Lurraren Ordua kanpainagaz: "Klimaren Aldaketaren kontrako udal ordenantza onartzea eta CO2 isuria gutxitzeko hartutako konpromisoa izan ziren horretarako arrazoiak. Aurten onartu den Negutegi-efektua sortzen duten gasak gutxitzeko Klimaren Aldaketaren Aurkako Programaren (2012-2015) bitartez lortu gura dute azken konpromiso hori".