Bisitari kataluniar eta frantziarrak nagusi aurten ere Turismo Bulegoan

Iaz %40 hazi zen Turismo Bulegoko kontsulta kopurua; aurten iazko datuei eutsi diete.

Turismo Bulegoak kontsulta kopuruetan igoera nabarmena izan zuen iaz; %40 gehiago 2009ko datuekin alderatuta. Aurten, iazko hazkundea egonkortzen duten datuak jakinarazi dituzte. 2010ean, irailera bitartean, 4.597 bisita jaso zituzten; aurten kopurua 110 lagun gutxiagokoa izan da: 4.487, guztira. Iazkoaren antzera mantentzen den beste datu bat bisitarien jatorria da; estatu mailan, aurten ere, Kataluniatik jaso dituzte kontsulta gehien, eta nazioarteko datuei erreparatuz gero frantziarrak izan dira Turismo Bulegora sarrien hurreratu direnak, iaz legez.

Ohikoa den moduan, bisita gehienak herrikoak dira, durangarrak (%34,5); estatutik datozen bisitarien kopurua ere ez dabil kopuru horretatik aparte: %30. Euskal Autonomia Erkidegoko kontsulta kopurua %21,4koa da eta atzerritik jasotakoa %13,7koa.

Estatutik jasotako bisiten datuak desglosatuz gero, aurten ere kopururik handiena kataluniarrek osatzen dute: 381, guztira, bisita kopuru guztiaren %28,2; Madrildik 190 lagun etorri dira, Valentziatik 142 , Andaluziatik 119 eta Gaztela Leondik 99.

Nazioarteari dagokionez, frantziarren bisita kopuruak gainerako edozein herrialdetako kopuruen oso gainetik daude. Urtarriletik abuztu amaierara, Turismo Bulegoak 163 kontsulta jaso ditu Frantziatik (%37,8). Ondoren, Italia (%13,9), Alemania (13,2), Erresuma Batua (%12) eta Ameriketako Estatu Batuak (%9,5) datoz, hurren hurren.

 Euskal Autonomia Erkidegoko datuek erakusten dutenez, Bizkaikoak dira kontsulta kopuruaren hiru laurdenak (739 bisita, guztira). Ondoren,  Gipuzkoa eta Araba datoz, 127 eta 95 bisitarekin. 

* Urtarriletik abuztu amaierara arteko datuak