Gaia taldeka landuko dute Andra Marian, Parte Hartuz masterreko kideekin.
Elkarteen eta norbanakoen parte-hartzeari buruzko iritziak jaso ondoren, Parte Hartuz masterreko kideek biharko hitzordu berria ipini dute: 11:00etan Andra Mariko elizpean aurrekontu parte-hartzaileen gainean sakonduko dute eztabaida taldeetan banatuta.
Aurrekontu parte-hartzaileak sortzeko metodologia diseinatzeko pausuak dira orain artekoak. Durangoko Udalak Parte Hartuz masterreko kideei metodologia hori prestatzeko eskatu die.
Biharko eztabaida-saioaren ondoren, hilaren 9an formakuntza tailerra eskainiko dute EHUko iralkasleek; aurrekontu parte-hartzaileak sortzeko metodologiaren diseinua landuko dute. Joseba Landa masterreko kideak azaldu duenez, “tailer horretatik txosten bat aterako da, eta hori alderdi politikoei aurkeztuko diegu”. Liburutegian hasiko da tailerra, 18:30ean.
Durangarren erantzuna
Joan den eguenean norbanakoen iritzia jasotzeko hiru galdera luzatu zizkieten masterreko kideek durangarrei: “Durangon parte hartzen da?”; “Zer dakizu aurrekontu parte-hartzaileei buruz?”; “Zelan diseinatuko zenuke horrelako aurrekontuak egiteko metodologia?”. Landak adierazi duenez, orokorrean Durangon parte-hartzeko kanalak "nahiko eskasak" dira gerturatu zirenen iritziz. Aurrekontu parte-hartzaileak egitea “oso interesgarria” dela pentsatzen dute, baina “praktikan egitea gaitz ikusten dute”.