Zirkin gimnasioan sutea piztu zen ostegunean

Ostegun eguerdian, 13:10 aldera, sutea piztu zen Zirkin gimnasioan. Ez zen zauriturik izan eta su-hiltzaileek itzali zuten sua. 13:10 inguruan aldegelatik ke beltza irteten zela ohartu ziren Zirkin gimnasioan zeuden erabiltzaileak. Eraikina hustu eta su-hiltzaileei abisua eman zieten. Ertzaintza, udaltzaingoa, Gurutze Gorriko anbulantzia bat eta su-hiltzaileen lau kamioi etorri ziren segituan. Su-hiltzaileak atzeko partetik (Kurutziaga ikastolaren aldetik) sartu ziren. Atzealdetik ez zen kerik ikusten, baina aurreko aldetik bai. Su-hiltzaileek jakinarazi zutenez 14:00etan identifikatu zuten sorburua: aldageletan piztu zen, sauna eta solariuma dagoen aldageletan. Hamar bat minutuan itzali zuten sua.