Mugarra odol-emaile elkarteak 40 urte ospatuko ditu zapatuan, ekainaren 27an, Landako Gunean. “Besteei bizia eman edo osasuna berreskuratzen laguntzen” duten odol-emaile aktiboak omenduko dituzte, 11:00etan hasiko den ekitaldian.
Transfusioen Euskal Zentroko arduradunek berbaldia eskainiko dute 12:00etan, eta, gero, Durangoko Orfeoiaren emanaldia eta luntxa izango dira.
Elkarteko presidente Jose Martinek gogoratu du 1.250 odol-emaile direla: %78 dira ohikoak, eta berriak %3-4 inguru. Profilari dagokionez, %4,96 dira 18-25 urte bitartekoak; %43, 26-45 urtekoak eta %51,6, hortik gorakoak. Transfusioen Euskal Zentroko ordezkariak, Alvaro Larreak, belaunaldi aldaketa behar dela nabarmendu du, odol-emaileen gizarte-lana aitortu eta gero.
Odol-emateetan nagusi ei da Durango, Bizkaia eta EAEn: “Agerikoak dira 40 urteok”. Aitziber Irigoras alkateak, “elkartasun” eta “erantzukizun” lana goratu du.