Sortu zenetik hamarkada bete dela ospatzeko jaialdia antolatu du Gara egunkariak Durangon. Barikuan, urtarrilaren 30ean, da hitzordua, Landako erakustazokan.
Irakurle, akziodun, hornitzaile, langile, laguntzaile eta lagunei luzatu die gonbita urteurrena ospatzeko jaialdian parte hartzeko, eta sarrera doanekoa izango da. 1999tik gaur arte egindako ibilbidea ospatzeko ‘Libre’ leloa aukeratu du Garak.
Landako erakustazokarako ateak 19:30ean zabalduko dituzte, eta 19:45ean hasiko dute jaialdia; Igor Elortza eta Jon Maia bertsolariak gonbidatu dituzte horretarako. Horren ondotik, hainbat izango dira prestatutako ekitaldiak. Zenbait bideo emanaldi eskainiko dizkie Garak bertaratuko direnei.
Berbaldia eta luntxa
Horrezaz gainera, egunkariaren Donostiako erredakzioarekin zuzeneko konexioak egingo dituzte, eta berbaldia eskainiko dute bai Mertxe Aizpuruak Garako zuzendari-ohiak bai gaur egun zuzendari den Josu Juaristik. Hala jakin eragin dute arduradunek. Ondoren, bertaratutakoei luntxa eskainiko diete, 20:15 inguruan izango da, arduradunek adierazi dutenez.