Udal Artxiboa osatzen duten jatorrizko agiriak digitalizatzen hasita dago Durango, horiek zaintzea eta eskuragarritasuna zein kontsulta erraztea helburu hartuta. 1553tik 1832ra arteko osoko bilkuren akta-liburuak kronologikoki digitalizatu dituzte dagoeneko, beren beregi sortu eta 2009an erabilgarri egongo den web orrian ipintzeko.
Denera, 12.000 irudi inguru aztertzeko aukera eskainiko dute; irudi bakoitzak liburuetako folio bat islatzen du. Gainera, kontsulta errazteko datu-basea sortu dute, bilkura bakotxean landutakoa laburtuz.
Bigarren ekinaldi baten, artxiboan gordetako Erdi Aroko dokumentazioa digitalizatzea da helburua; horrek 18.000 irudi inguru izango ditu eta kontsulta errazteko datu-basea ere bai. Ondoren, artxiboko gainerako dokumentazioa digitalizatuta eskaintzea da asmoa, Jose Angel Orobio-Urrutiak azaldu duenez.
1820tik 1980ra bitarteko akta-liburuak eta herriko elizetako, ermitetako eta kofradietako fabrika-liburuak ere jasoko dituzte internetean, kontu-liburuak ez eze, Orobio-Urrutiak argitu duenez; eta, Durangoko hainbat aldizkari zein II. Errepublikako, Guda Zibileko eta Gerraosteko agiriak ere bai.
Artxibo historiko oparoa
Udaletxean den administrazio-artxiboak —kudeaketa administratiboa lagunduz udaleko sailei zerbitzua emateko— eta 1985az geroztik Arte eta Historia Museoan dagoen artxibo historikoak osatzen dute Udal Artxiboa. Orobio-Urrutiak azken horren garrantzia gogoratu du: “Fondo aberatsa izateaz gainera, bakarrenetakoa da XVI. mendetik aurrera akta eta kontu-liburuen sail osoak dituena”. 1405etik 1820ra arteko 8.763 espediente daude: “1554an Durango erre bazen ere, Andra Marin gordetako agiriak ere baditugu”.
Jaurlaritzatik 7.700 euro inguruko laguntza lortu dute, eta, gura lukete bide beretik jarraitzea. Udal Artxiboa Kalebarriko liburutegira eramango dute: “Azterketarako mahaiak jarriko dituzte, baina, behin digitalizatu eta gero ezingo dira jatorrizko agiriak erabili”.