Krisiak eragindakoak eta “batez ere erregulazio prozesuetan direnak” defendatzeko, batetik, eta, bestetik, “justifikatu bako espedienteak aurkezteko krisia aprobetxatzen” duten enpresa batzuen “oportunismoa” salatzeko, manifestazioak irtengo du, bihar, azaroaren 28an, Durangon, LAB sindikatuak deituta; Durangaldeko Gazte Independentistek ere bat egin dute 12:00etan udaletxearen aurretik irtengo duen manifestazioarekin.
Gaur egungo abagunearen eraginez ehun enpresa inguruk “itxi egin du edo langileak kaleratu ditu”. Azken asteotan Zornotzako Torrespapel enpresaren ixtea iragarri dute. “Iaz 830 milioi euroko irabaziak izan arren, 53 langile utziko dituzte kalean”, nabarmendu du LABeko Oier Perezek. Azken urtean 15 milioi inguru irabazi ei zituen Zornotzako Alcoak ere 104 langile kaleratzea planteatu du.
Sentsibilizazio kanpaina
Sentsibilizazio sozialerako kanpaina iragarri du Sarriopapeleko Enpresa Komiteak —ELA, LAB eta UGT dagoz ordezkatuta—, lanpostuak mantendu daitezen eta enpresa ez dezaten itxi. Torraspapel taldean dagoen Sarriopapelen Zornotzako lantokia itxi egin gura da. Torraspapelen egoera ekonomikoa “nasaia” dela gogoratu dute, hala ere, bai Torraspapelen bai Sarriopapelen enplegua erregulatzeko espedienteak planteatu direla, 400 langile kaleratzea aurreikusiz. Enpresaren planteamendua ez du onartzen komiteak, “ez dagoelako arrazoi ekonomiko, produktibo zein antolatzailerik horretarako. Ematen du gehiago irabazi gura dutela, familiek eta lanpostuek ez dute garrantzirik”.
Enpresari lantokia ez ixtea eta enplegu-erregulazio espedientea ez aurkeztea eskatzen die. Eusko Jaurlaritzari, berriz, espediente horren aurkako jarrera agertzea eskatu diote, baita Madrilen ere, eta Industria Sailari “geure enpresak mantentzeko neurriak hartzea”. Langileekin batzartzera deitu dute Zornotzako alkatea ere, eta lanpostuak mantentzeko neurriak planteatu ditzala eskatu diote.