Joan zen zapatuan bere herriko antzokian erakutsi zuen 25 urteko Sheila Gonzalez durangarrak Un paso más izeneko bigarren kopla emanaldia. Kantariaren berbetan jaso dugunez, ikuslegoak “oso ondo” hartu zuen ikuskizun berria.
Iragan abenduaz geroztik, modu “serioagoan” dihardu Sheilak kantuan. Kopla, sentitzen duena adierazteko modurik egokiena duelako kantatzen duela azaldu digu durangar gazteak, eta oholtza gainetik ikusleen txalo eta “piropoak” entzutea dela bizitzan izan duen esperientziarik politenetarikoa.
Iragan maiatzean kaleratu zuen Copla se escribe con S bere lehenengo diskoa, eta ordutik Espainiako hainbat jaialditan erakutsi ahal izan omen du abeslari eta dantzariak. Andaluziako jatorriko kantua ez ezik, dantza ere lantzen ditu Sheila Gonzalezek; Cale Bari taldean 15 urte daramatza dantzan, eta, Durangoko Andaluziako Elkarteko dantza taldeetako irakasle eta Coro Sur abesbatzako zuzendaria ere bada.
