Aurretik, hil-kapera jarri zuten udaletxean. Eguerdiko lehen orduetatik, lagunak, senideak, herritarrak, hainbat alderdi politikotako ordezkariak eta uriko elkarteetako ordezkariak bertaratu ziren. Bihotzeko gaitz baten ondorioz hil zen 2003tik Durangoko alkate izan dena, 61 urte zituela. “Larri baina egonkor” egon ondoren, bihotzean kirurgi operazioa egiten zihardutela hil zen. Hiru eguneko dolua ezarri zuten, Udaleko Bozeroale Batzordearen erabakiz. Ziarrustaren alabek eta udal alderdikideek, EAJaren Uri Buru Batzarreko lehendakari eta Durangoko alkate ohi Pilar Ardanzaren babesa izan zuten. Bizkai Buru Batzarreko Andoni Ortuzar eta Jose Luis Bilbao
Bizkaiko Aldun Nagusia be izan ziren Durangon, familiari elkartasuna adierazi guran, Eusebio Larrazabal eta Patxi Sierra-Sesumaga ordezkari jeltzaleak ez eze. Durangoko EB-Berdeak, Aralar, PP, EAE-ANV eta PSE-EEko ordezkariak ere izan ziren. EAJren domina jarri zuen hilkutxaren gainean alderdiko lehendakari Iñigo Urkulluk. Juan Jose Ziarrusta pertsona “guztiz konprometitua” zela nabarmendu zuen Euskadi Buru Batzarreko buruak.