Egun beltzenak gogoratu dizkigu martxoaren 31k

Anboto 2008ko api. 1a, 11:25
Hegazkin italiarrek Franco eta Mola jeneralei laguntzeko hiria errukirik gabe bonbardatu zuten eguna ekarri du gogora Durangok: 1937ko martxoaren 31. Etengabeko kanpai-hotsek iragarriko zutena jakiterik ez zuten herritarrek; Mussolinik bidalitako ‘Aviazione legionarioak ‘ 11 tonatik gora bonba jaurti zituen egun beltz hartan, eta 336 lagun hil.
Hegazkin italiarrek Franco eta Mola jeneralei laguntzeko hiria errukirik gabe bonbardatu zuten eguna ekarri du gogora Durangok: 1937ko martxoaren 31. Etengabeko kanpai-hotsek iragarriko zutena jakiterik ez zuten herritarrek; Mussolinik bidalitako ‘Aviazione legionarioak ‘ 11 tonatik gora bonba jaurti zituen egun beltz hartan, eta 336 lagun hil.

martxoak31_toti.jpgKanpai-hotsez ekarri dituzte gogora orain 71 urte “Durangon giroa negarrez bete” zuten gertakariok, Toti Martinez de Lezea idazleak adierazi lez. Egun latz hartan eta Guda Zibil osoan zehar hildakoak omendu zituzten hilerriko gomuta ekitaldian.

Guda Zibilean hildako ia 400 lagunen izenak (alde bietakoak) batzen dituen kaperan egindako ekitaldira Jaurlaritza eta Foru Aldundiko ordezkari lez hurreratu ziren Izaskun Bilbao, Gabriel Inclan, Ana Madariaga eta Josune Ariztondo. Eurekin izan ziren EAJ, PP, PSE-EE , Aralar eta EB-Berdeak taldeetako ordezkariak.

Gogoratu beharra


Gertatutakoa ikertu eta gogoratzeko beharra nabarmendu zuten, “askatasuna eta bakea” aintzat hartuta beti ere, Juan Jose Ziarrusta alkatearen berbetan. Gerrak “mendekua eta suntsiketa” dakarrela eta “memoria historikoa berreskuratzea hildako guztiak gogoratzeko eta belaunaldi berriei horren izugarrikeriak erakusteko” modua dela nabarmendu zuen. “Alde batekoak eta bestekoak” omendu gura izan zituzten. Ildo horretan, 1936ko irailaren 25ean Durangon lau bonba jaurti ondoren, ustez Frankoren aldekoak ziren 21 durangar fusilatu zituztela ere gogoratu zuten.

Bonbardaketaren ondoren bizirik iraun zuten durangarrak eta hildakoen senideak ere batu ziren. Isilunea gorde zuten eta, kanpai-hotsen ondoren, hainbat lore eskaintza egin ziren. Durangoko EAE-Udal Taldeak, baina, ez zuen lore-eskaintzan parte hartu, biktimak gogoratu behar direla uste arren, Udalak bonbardaketan gertatutako guztiak eta hilketen zirkunstantziak zehatz ikertzeko erronka zain daukala iritzita, “gerran hildako guztiak plaka berean jarri beharrean”.

marxtoak31_omenaldi.jpgIluntzean Andra Mariako elizpean jarri zuten lore sorta bonbardaketa bizi zuten Pako, Alberto eta Martin Barreña anaiek. Bonbardaketan hildakoak ekarri zituzten gogora, aurreskua eskaini zuten eta Durangoko Martxoak 31 musika taldeak 1937 martxoak 31 abestu zuen.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!