“Salbuespen egoera” salatu dute Durangaldean

Durangaldea “salbuespen egoeran” dagoela eta irailetik “jasandako errepresioa inoiz baino gehiago areagotu” dela salatu du Amnistiaren Aldeko Mugimenduak Durangon: “Eguneroko kontua dira errepideetako kontrolak, jarraipenak eta identifikazioak. Kaleak okupatu dituzte; eta mendiak, paseatzera doan jendea identifikatuz”.

"Kontrol sozial itzela” nabarmendu dute, hedabideen aurrean egindako agerraldian: “Herri honen kontrako tresna errepresibo asko eraiki dituzte, dena gure lan politikoa eta independentziaren aldeko nahia trabatzeko”. Burlata, Donostia, Gasteiz eta Lea-Artibaiko sarekadak aitatuz, egoera “Euskal Herri osora zabaldutakoa” dela diote: “Herri honen eskubideen alde lan egiteagatik euskal herritarrak atxilotu eta kartzelaratzeko muntaia polizialak”. Iurretako atxiloketak ere batu dituzte horretan.