Askotariko produktuak “preziorik onenean” izango dira, Dendak Iurreta eta Durangoko merkatari elkarteak eratutako III. Aukera Azokan.
Barikuan, otsailaren 8an zabalduko dute 17:00etan, Las Circas del Sol Drag Queen taldeak eskainiko ikuskizunak eta Txatunga Bemberen batukada soinuek girotuta. Azokak 21:00ak arte izango ditu ateak zabalik.
Zapatuan, hilaren 9an, berriz, arratsaldez ez eze, 10:00etatik 14:00etara ere izango da hurreratzeko aukera, eta domekan 11:00etatik 14:00etara eta 17:00etatik 19:00etara.
Aitatu dezagun, zapatuan, pailazoak eta globoflexia ikuskizuna izango direla 17:30ean, eta domekan ipuin kontalaria. Ludoteka, umeentzako tailerrak, kafetegia eta aparkalekua ere eskainiko dituzte egunotan.
