Durangaldeko Behargintza saritu dute Garapenek —Garapen Agentzien Euskal Elkartea— antolatutako I. Innova Lehiaketan. Agentziek eurek eskainitako zerbitzuekin lotutako “ideia berritzaileenak” saritu dituzte.
Durangaldeko Behargintzak proposatutako orienta-line zerbitzua tartean. “Poztasun handiarekin” hartu dute berria bai Durangaldeko Behargintzak bai Durangaldeko Mankomunitateak ere.
Behargintza agentzia bakoitzaren web zerbitzuan amankomuneko plataforma bat instalatzean datza orienta-line zerbitzua: batetik orientatzaileen eta, bestetik erabiltzaileen parte-hartzearekin. Aurretik erabiltzaile legez erregistratu eta gero, euren galderak edo lan bilaketarekin dituzten zalantza guztiak planteatzeko aukera izango lukete erabiltzaileek, Behargintzako Gerazne Aranak azaldu duen moduan: “Enplegu bilaketarekin lotutako hainbat kontsulta egiteko aukera legoke: ikastaroei buruz, lana bilatzeko tresnei buruz…”.
Inguruan eta gizartean hainbat aldaketa eta aurrerapen teknologiko izaten direla deritze Behargintzakoek, “eta enpresa eta erakundeek horri egokitu beharra” dutela lehiakor izateko; baita euren erabiltzaileei “kalitate handiko zerbitzua eskaintzeko” ere. Lehiaketaren berri izanda, gogoan zituzten ideiak planteatu eta aurkeztutako 12 proposamenen artean saritu dituzte, beste birekin batera.