Santa Anako Izarra sortu da gazteen ardurei erantzuteko

Durangoko gazteria batu guran eta “komunak dituzten hainbat arazo eta ardurari erantzun” guran jaio da Santa Anako Izarra, Durangoko gazte bilgunea. “Topiko guztiak apurtu eta beste alternatiba bat” eskaini gura dute eta, bide horretan, zapatuetan elkartzen dira Santa Ana plazan, 11:00etan. Bertan 40 lagun inguru elkartu ohi dira; hala ere, dei zabala egin diote gazteriari parte hartu dezan.

Neoliberalismoak dakarren gizarte eredu “zanpatzailearen” ondorioz Durangoko gazteei zuzenean eragiten dien arazoei aurre egiteko jaio da Santa Anako Izarra. Ildo horretan, aurrera begira, Durangoko gazteek “sufritzen duten” problematika orori aurre egiteko asmoa izan arren, “premiazko borroka edo fronte bi” jorratzen hasiak dira: Abiadura Handiko Trena (AHT), eta, trena lurperatu ondoren egungo trenbidearen tokian egingo den “makroproiektu inposatua”.

Elkartasuna eta elkarlana lako baloreak zabaldu eta Durangoren “herri izaera defendatzea” dute helburu, “jendarte eredu honek, politikari ustel eta euren adiskideen negozioen mesedetan, nortasun kolektiboaren galera ahalbidetu eta bultzatzen duen heinean”. Diotenez, “kapitalismo alienatzaileak, kontsumismo, merkataritza zentro erraldoi, neurri bako espekulazio, prekarietate, bazterketa sozialekin… bonbardatzen jarraitzen du”.

Gazte Topaketak

Durangoko I. Gazte Topaketak antolatzen ere badihardute. Aurreratu dutenez, ekainaren 30erako berbaldi-eztabaida, bazkari, kalejira eta beste hainbat ekitaldiz hornitutako egun osoko egitarau “erakargarria” osatuko dute: “ahalik eta gazte gehien batzeko, guztion ideiak jasotzeko eta jai giroan amaituko den egun itzela bizitzeko”. Parte hartzera deitu dute.