Herri barruko komertzio txikien “egoera makalaren” eta Merkataritzaren azken lege dekretuaren aurrean arduratuta dagoz merkatari eta ostalariak. Durango eta Iurretako dendak merkatari elkarteak azaldu duenez, aitatu lege dekretuak kanpoaldean saltoki handien ezarpena “gehitzen” du eta “horiei mesede egiten die, “oraingo 700.000 metro koadroak 1.500.000 metro koadro bihurtzeko aukera emanez”.
Egoera horren aurrean, dendak elkarteak Durangoko alderdi politikoen iritzia eta “etorkizunari begira lankidetzan jarduteko nora arteko konpromisoa” hartzeko prest dauden jakin gura du.
Hainbat ardura
Ildo horretan, 10 galdera helarazi dizkie alderdi politikoei, “udal hauteskundeak aurretik erantzuteko”. Finean, “zalantzak, txarto ulertuak, txarto egindakoak…” batzen ditu galdera sortak. Alderdien iritzia jaso gura dute: “Aurten, merkataritza foro bakarra egin da. Dagoeneko ez da egiten. Badugu merkataritza zinegotzi bat, baina, eraginkorragoa izan behar da, eta ez mintzakide soila: autonomia gehiago behar du”.
Lizentzien tramitazioan epe batzuk zehazteari ere “oinarrizkoa” deritze: “Tramitazioa bizkortu behar da. Ezin daitekeena da establezimendu bat urte bian itxita egotea horregatik. Epeak finkatzea behar da”. Jaurlaritzatik aitatutako “bilguneen” aurrean duten iritzia ere batu gura da: “Esku-hartze publikoa dela-eta zer uste dute. Horren jardunaz ez dakigu, baina, elkarteek ezin dute autonomia, erabakitze-maila, galdu”.
dendak-ek “doako aparkaleku publikoak” behar direla uste dute eta Durangok “astialdian izan duen lidergoa berreskuratzeko” zerbait egin behar dela.